移民新政策對你影響有幾大？《2》
經常都有人問里奧叔叔台灣做生意難唔難？要成功要注意乜野？
講真，就算講曬比你聽你又真系識做？
其實每個地方營運生意都有人成功和失敗，但開始前最起碼要對當地市場文化要有一定既了解，只要有足夠時間去了解市場文化，無論做咩生意都一定事半功倍，否則經驗再豐富都系枉然。
今日想同大家分享下一間香港人的小麵店。
呢間麵店既老闆系香港人，里奧叔叔每次去到餐廳見到老闆都會打下牙骹，老闆好年輕而且對市場觸覺好敏銳，我地每次打牙骹都離唔開生意話題。
港式餐廳競爭大，要跟隨本地飲食文化。
好多香港人黎到台灣就話賣奶茶點心，所以依家D港式茶餐廳開到好似拉面店咁週圍都有，台灣人雖然都好接受港式餐廳，但一個月會去幾多次呢？大家系香港都唔會餐餐食壽司拉面啦。
小麵店生意好到爆炸，有幾招都做得好好。
知道年輕老闆有新搞作，里奧叔叔當然去棒場啦，嘩…… 咁多客既？呢個地點…… 呢個鋪位…… 呢個格局……，里奧叔叔系餐廳門口等位，再望下週圍環境，明曬！呢位老闆真系好野👍👍👍👍。
地點位於商業中心的後卷街道三角鋪位，呢個位置既鋪位租金一定唔會貴，麵店老闆有分享過比里奧叔叔知個租金，但呢個別人既商業秘密我就唔分享啦，但呢個位置開麵店做寫字樓客真系一流。
台灣速食文化，慢活並非唯一。
人地話慢活台灣，唔通真系返工都hea住食lunch 咩，麵店既定位好適合本地人，售價$100-$130台幣一碗撈面，口味又形合台灣南部人「偏甜」，客人就自然多，全院滿座。
但鋪仔細細坐到爆都只得2-30個位，點解廚房伙記做到冇停手？
台灣近年都好流行Ubereat , foodpanda 外賣，麵店老闆好叻，系呢度開店租金平，但地理位置極好，附近人口密集連外賣app生意都做埋，鋪頭細細客人唔想等位就外賣，有好多客就直頭用外賣app落單，一間鋪仔做曬咁多生意，唔怪得廚房咁忙啦。
外賣APP抽成高，但計好成本定好價就無野怕。
人地大刀闊斧既廣告去推行外賣app 唔通免費幫你做咩，呢個世界要有服務就當然當比錢啦，麵店老闆當然明白呢個道理啦，唔系點會咁成功，佢仲有好多好多諗頭，全因為佢對台灣既市場文化越黎越了解。
所以台灣生意好做嗎？
如果你問里奧叔叔，我會答：好做，不過你要有足夠時間了解呢個地方既市場文化。
待續……里奧叔叔的台灣創業是如何開始？
記得幫手分享呀
#里奧叔叔的台灣創業路
#移民台灣
#投資移民
#台灣移民新政策
#台灣營商
Search